GD Star Rating
loading...
عدسة شاب درعاوي مغترب- درعا معربة

عدسة شاب درعاوي مغترب- درعا معربة

مشتاق للقضقاض والينتون
والشيح والقيصوم والزعتر

للعنب للتين والزيتون
و لصوت أبو ابراهيم لا كبـّر

للشيخ محمود ودمع العيون
ينزل على الخدين لا ذكـّر

مشتاق لصياح وطبل كرزون
وحّد الله وفيق وتسحر

مشتاق للتوحيش وسورة نون
ورمضان لا عشـّر وكشـّر

مشتاق للدفلات والدحنون
للعطرة يا سبحان من صوّر

للمسكة للكينات ع العيون
للمرج وجرن المي المدوّر

للطـُقـِطقة للفخ والجعطون
يومن نصا المنقاع ما نكـّر

للموقده للصاج والكانون
وللشمعدان بعتمنا نوّر

بالغار والبلا ّن شو مفتون
ومية الجهير نعدّها الكوثر

بالشكوة محلى الخاثر المشنون
وعروس زبدة مرشرشة بسكر

للعـِدل مشتاق للطاحون
للشربجي لا أقبل وزمر

بالشقلة والكعبيش شو مبخون
وبالمور والجورة أني الأشطر

أشقط عن المادّ ويالله العون
والراس لا موّر ولا وجوّر

مشتاق للمعجن على الطابون
ورغيف قمح مروّج مقمـّر

وبريق أمي الإزرق المدهون
والشاي مغلي فيه ومخمـّر

وقراصها بالقزحة والينسون
لونو بلون الجاج المحمر

والخابية تناديك يا مزيون
إشرب قـرح مبرود ومقطـّر

للجرن و البن فيه مطحون
مصخي عليه بالهيل ومبهـّر

لحسين حوراني ينادي هون
يازغير عصفور الحلو طيـّر

مسكين ها الحراث شو مغبون
لاشال عود الحرث وتيسّر

يمشي ورا فدانه المقرون
و يسوق بالمنساس لا دقـّر

للمدحلة مشتاق والمرجون
للعـَبوة للماعوص لا صفـّر

للصوبية تدفـّيك بالطاعون
للجزل لا طقطق وجمّر

للرحت عالحيطان في كانون
لا عوبرت برد الشتا زمهر

للكشك مجروش أو مسحون
عمر الرحى ألفين أو أكثر

للسلك والكبـوت والبيتون
للدرب لا جلـّد وحو ّر

للشرش للدامر المردون
للحطة للإيشار المدور

يا مغزلي والصوف أنسى شلون
و المسلكة والبساط المقمـّر

مشتاق للقمباز والبسطون
للعصبة للسروال والشمبر

للغـُمـُر للحلــّة والحابون
للقش يوم الندى تغمــّر

للكبشة والكفكير وكل ماعون
للأنقري للقــِدر المشحبر

لسراج ماضي عالقطع مركون
والكاز والقمبور المشحور

بصرى علينا مستحيل تهون
كيف اخترت الفراق يامعثــّر؟

بصرى جبلها بحب رب الكون
ولما خلقها القالب اتكسـّر

وعيـَت عحفص ونافع وقالون
بعد ما خالد هزم قيصر

أرض الكرم والسيف والقانون
وفيها بحيرة بالنبي بشـّر

وفراقها ذلّ ووجع مطعون
ألم الولادة حين تتعسـّر

فيها المحبة والجمال فنون
تشرط علينا تمون وتتأمـّر

متزينة من كل صنف ولون
زينة هنوفة يوم تتغندر

غسـّل يـَد َكْ بالطيب والصابون
بعدين ألمس صدرها المرمر

كلشي بحلاها مدوزن وموزون
ما في إشي مقلل ولا مكثــّر

مدري ثراها بالمسك معجون
وإلا هواها مشبع بعنبر

مشتاق أحطها في جفن العيون
وأطبق عليها سنين واتفكـّر

واللي بهواها ذايب و مسكون
مهما صبر عالبعد يتمرمر

عايش وحيد بغربتو مسجون
عيشة نكد مهموم ومغثبر

ولو حاش هالمسكين مال الكون
يذرف عليها دموع ويتحسر

حبيب حوراني
30-3-2013

GD Star Rating
loading...
GD Star Rating
loading...