GD Star Rating
loading...

يا أخي… ما في أبشع من الشراكة… أنو تشترك أنت وهيك أربعة خمسة على مشروع واحد!!! ما بيمشي الحال…

 

هو بالمراحل الأولى ما بقلك لأ… الأمور بتكرج وبتمشي… بس مع الوقت إلّا ما يصير في خلافات ومشاكل, وبجوز توصل الأمور للضرب وشد الشعر… فأحسن حل كل واحد يشتغل لحالو… وأدي ما كانت الرزقة قليلة, بتضل أحسن من الشراكة…

 

هلأ ليش خطر ببالي هالخاطر… لأنو يا عمي هي الشركة الثورية ذات المساهمة المغفلة يلي صارت عنا بسوريا… والله حالها عم يرجع لورا!!!

 

هو صحيح بالبداية كانت شادة وأمورها عال العال, وكل الناس انبهرت فيها… بس يا عمي هالنجاح فتّح عيون كتيرة عليها…

خيو مستثمرين من هون وهون ومن كل حدب وصوب, وكل مستثمر لفيلو على شريك بهالشركة, وصار يلعب بعقلو مشان يشاركو…

وخود على تكبير راس وتناحة بالشركة… وكل شريك صار مفكر حالو هو الأهم والأول بالشركة…

 

بئا أحسن حل يفضوها لهالشركة… وكل واحد يفتح دكانة لحالو… كل واحد يشفلو مستثمر من برا, وصلى الله وبارك…

 

بس في مشكلة عويصة رح بتصير L

خوش هو صحيح كل الشركا بلهموطية وطماعين… بس للصراحة… في شريك منن أخلاقو كتير كويسة, وملتزم وقبضاي… بس يا حسرتي عليه… مكرسح, مدري أخرس, مدري أعمى, مو طالع صوتو… وعلى طول كل الشركا نازلين فيه بهدلة… يعني لا بحل ولا بيربط…

 

 هنى مو مشاركينو لسواد عيونو… لك هادا بالأصل هو صاحب الشركة, وهنى مشاركينو بس مشان اسمو… يعني فيكن تقولوا حاطينو واجهة…

 

بس بما أنو الشركا ما عاد ظبطوا مع بعض, وبلشت مشاكلن, وطلعت ريحتن… ففض الشركة أهم وأولى, وبلا واجهة بلا بطيخ…

 

طيب إذا انفضت الشركة… هالمسكين شو رح بصير فيه!!!

ما بظن في مستثمر رح يقبل فيه…

 

حواليكن حدا يتبناه, ويصرف عليه هيك لوجه الله؟؟؟ يعني من هداك تبع الخير وارميه بالبحر؟؟؟

GD Star Rating
loading...
GD Star Rating
loading...