GD Star Rating
loading...

جنيف

خيو عملتو حسابكن أنو باجتماعات الحوار بـجنيف ,, ح يكون لكل فريق بوفيه  غير التاني ,, يعني ما معقول يطلعو الشباب بريك لياخدو فنجان قهوة و يبخو سيكارة ,, يقوم يشتغل رق الكف بين بعض و ينط حدا عاقل من هيئة التنسيق مثلا يفك بين الطرفين ,, مو واردة منوب ,, خلينا نتفادى هيك ولدنات ,,
اي طبعا و لو ,, حكينا مع الشركة المستلمة التنظيم , أنو الطاولة تكون مستطيلة , و واصلة من الحيط للحيط , و تكون عريضة كمان , كرمال اذا حدا انتتر و مد ايدو اثناء احتدام النقاش ما تطول حدا من الطرف التاني ,, و كمان قلنالن يعملو ورى كل طرف باب بياخد على بوفيه منفصل على بوفيه الفريق التاني ,,
تمام تمام ,, هلق هيه اجراءات سلامة اولية , لأنو بعد كم جلسة ح ياخدو بعض مباوسة قبل ما يدخلو الاجتماع ,, بس أنو مبدأياً الحذر واجب , بس لتمشي القصة و تقطع كم يوم و ياخدو وش ع بعض ,,
لك بس اليوم طلعلنا صواب ما بالحسبان ,,
خير ؟
رفعت جاي و بدو يحضر
ايوا !! طيب و ما عرفتو مع مين بدو يقعد ؟
أخي مع النظام ما بيظبط ,, يعني بينقال من وين لوين هاد جاي معن , مو بالحساب هو ضد النظام و مدري شو ,, فالزلمة آخدها من قصيرا و رح يقعد مع المعارضة  ,,
معقولة الفكرة ترى ,, بس بقا هيك رح يطلع هوي و المعارضة ع نفس البوفيه ,, و الخوف تنفتح سيرة حماه بينو و بين جماعة الاخوان ,, نكون بشي نصير بشي ,, يتماسكو و يضربو بعض ,, يعني التنين جماعة ختايرية , فلا هوي لقيان و لا جماعة الاخوان لقيانين الكف ,, يقوم مثلا يفزع حدا من باقي المعارضة لجماعة الاخوان و يتكاترو ع رفعت و ياكل شي صواب يروح فيها ,, مشكلة ,,
اي معك حق ,, شو بدنا نقول للعالم وقتها ؟ جبناهن لنوقف القتل بين المعارضة و النظام ,, قام المعارضة قتلو بعض ,, مو حلوة بحقنا ,, طيب شو الحل ؟
اخي خلينا نعمل الطاولة مثلثة ,, بيقعد النظام ع طرف و رفعت ع طرف و البقية ع طرف ,, و ورى كل طرف باب بودّي على بوفيه مستقل ,, و هيك ما منخليلن مجال يختلو ببعض ,, شو قلت ؟
لأ لأ مو ظابطة ,, حتى بنظر الإعلام يعني ,, انو المعروف في طرفين مختلفين مو تلاتة ,, بعدين شو طاولة مثلثة ! أخي مو راكبة منوب منوب ,,
مممم طيب منخلي الطاولة مستطيلة , و منشوف المعارضة اذا بيرضو يطلعو مع النظام عالبوفيه ,, كونن الطرفين كتار و مافيهن يتاكترو ع بعض ,, عندك مثلاَ وليد المعلم خرج حدا يتكاتر عليه ؟ ما خرج ,, و هيك ما بيجتمعو المعارضة مع رفعت ,, شو رايك ؟
ما بعرف ,, عجب بيرضو يجتمعو مع النظام بنفس البوفيه ؟
أخي اذا رضيو يقعدو بصف واحد مع رفعت ,, ما ح يرضو يشربو القهوة و يبخو سيكارة مع النظام ؟؟

……………………………..
الثـورة بـعون الله منتصـرة ,,
منـار حـيدر

GD Star Rating
loading...
GD Star Rating
loading...