GD Star Rating
loading...

لما شفت الولدنة اللي اجا ع بالي احكي عنها اليوم, تذكرت زوجي و جكرو..

جوزي مالو ضد الثورة كمبدأ (مع اني ببادلو الجكر و بقلو انت منحبكجي), بس ضد الطريقة و التنفيذ و من اول اليوم…من جماعة انو مافي رؤية و ما نضجت و هالحكي..كنت بالاول قلو هي اسمها ثورة, العالم بتثور و بس تخلص الثورة بتبلش تعمّر و تصلح..كنت متفائلة اكتر و كانت صورة الثورة مشرقة اكثر..المهم, قضيناها خناق و مشاكل من لما بديت الثورة لهلأ و حتى لما كنا كل حدا ببلد و حتى الشغلات اللي متفقين عليها بما يخص نقد الثورة بيحكيلي ياها بطريقة تسجيل مواقف و انو شفتي..من اول قلتلك..بحسو بيحملني فشل الثورة و خراب البلد (بمنظورو)! شفتي شو عملتوا (بصيغة الجمع)..وصلنا لاتفاق انو كل واحد حر بقناعاتو و يصطفل (خاصة وقت عملت قصص بتخص الثورة محل مالي عايشة و قلي اسمك عند المخابرات مشان يخوفني :D) و انو خلص انا حرة, اصطفل..بعدين وصلت لمرحلة التطنيش و انو ما افتح اي مواضيع تخص السياسة معو..بس طبعا لا يمنع شي خناقة عابرة…المهم, من اكتر الشغلات اللي يستفزني فيها و اكبر نقد الو للثورة (قبل كلشي عم يصير هلأ من قصص السلاح و داعش و الاخطاء الكبيرة اللي كلنا منحكي عنها) يعني فعليا من اول الثورة متل ما قلت فوق, هوي ولدنة الثورة! يضلي يقلي هي ثورة ولاد..ولاد بدون يغيروا البلد,,ولاد عم يكتبوا و يحكوا و يطلعوا, ولاد عم يهتفوا و يقرروا و يغيروا..كلا ع بعضا ثورة ولاد و ما فيها نضج و لا خطة…طبعا من ضمن امثلتو انا :) كلشي بيخصني سياسيا, خناقات, تطلعات, احلام..بيعتبروا مولدن..و انو الثورة متلك ولد..هيك يختم و يبدا اي نقاش :/

مبارح شفت شي خلاني قول فعلا معو حق, شو هالولدنة..هلأ شايفة كتير شغلات قبل و حسيتا مولدنة..بس هي اكتر شي استفزتني..حملة ترشيح عروة الاحمد رئيس لسوريا..اكيد الكل شاف السجال و الجدل اللي بين عروة و ارك و لبنى و مدري مين..انا ما بتابع سياسة ابدا و لا الي فيها ابدا, فما فيني احكم مع مين الحق بشكل موضوعي و ما تابعت الموضوع اصلا…بشوف هالقصص ع الفيسبوك و بمشي..وثائق و اتهامات و حكي و كتير شغلات حسيتا بتزعل  و حسيتا قلة عقل و انو طيب انتو كلكون مع الثورة المفروض, لي دبّحتوا بعض ع هيك قصص..في طرق تانية للعلاج..بس بالنتيجة, بتطلعلي هالقصص ع القيسبوك و بمشي و ما عدت قريت اصلا..لمبارح شفت تبع الحملة و عامل الشير عروة نفسو..انو هي حركة جديدة بايخة من اللي عم يحاول يفضحون ببرنامج جدل و هني اسلوب الدفاع تبعون التشخيص و التسخيف و هالحكي..برجع بقول, انا مالي متابعة و مافيني احكم مع مين الحق..و ما بعرف مين ورا الصفحة و ليش..بس هيي بلا ادنى شك, حركة ولدنة من الطراز الرفيع..و شفت طبعا بوستاتها و شو العالم كاتبين, فعلا شغل ولاد! و شي بيحزّن..و هي فعلا مو اول و لا اخر مثال لا ع الفيسبوك و لا ع الارض حتى..قصص يمكن نمرق عنها و نقول سخيفة و بلا طعمة, بس بتتراكم و بتترك اثر..هلأ اكيد مافي شي اسمو ثورة منظمة بالمطلق والا ما كان اسمها ثورة اصلا..بس في كتير اخطاء ممكن تلافيها, ممكن التوعية ضدها قد ما كانت صغيرة او كبيرة..اخطاء تجنبها اسهل بكتير من تحمل اذاها..و المفروض من ضمن العمل الثوري التصدي لهيك اغلاط..

طبعا ما استرجيت ورجيه ياها لزوجي و قلو شوف بالله شو عاملين, حتى ما اعطيه فرصة يقلي, قلتلك ولاد!! و كمان للحق, انا بقول ع اللي اصغر مني بخمس سنين ولد, فعادي زوجي يقول عني ولد…

و اخيرا اترككم مع هالولدنة!

 حملة ترشيح عروة الاحمد رئيسا لسوريا

 

ســـارة

GD Star Rating
loading...
GD Star Rating
loading...