GD Star Rating
loading...

null

شكرا سيادة الرئيس

هلأ مو بشي بس انو أنا امت النظارة السودة على جنب شوي لما استنيت خطابك..و صابني بصراحة شعور متناقض..يعني كان عندي خوف انو هيك تشلف معك و تسلخنا شي قرار مكن،،او تضحي بحدا مكن

بس أول ما خلص خطابك حسيت كأني بدي اوم و طج ركعتين شكر

رح اترك موضوع التحليل السياسي كلمة بكلمة ليللي هيك شغلتون..بس انا كمواطن بسيط ( بس مو خاروف على حد علمي ) بدي انشر أول شي خطر ببالي

أول ما سمعت أول (سَ) اجت بخطابك شعرت بارتياح و شي بيطمن..بس ما عاد حملني عقلي لما سمعت كلمة مؤامرة و تحليلك لمطالب الشعب …يعني و الله واضحة..شباب حاملين لافتات مكتوب عليها بدنا مازوت و شمينتو و مستعدين يموتو مشانها…يعني شو رح يكون بدون؟؟؟

بيني و بينك أنا كمان شغلت مخي و صرت حلل الوضع و اكتشفت من خطبتك العصماء الأفكار المخربطة الآتية

ما في شي صاير جوات العيلة..ايه طمنتني عالعيلة…و من ثبات خطابك أنا تأكدت انو الأمور تمام التمام

ما رح نجيب سيرة المؤامرة..بس هي موجودة عجبكون ولا ما عجبكون..يعني بالصرماية

رفعنا حالة الطوارئ،،و ما حدا اعتقل إلا بموجب مذكرة أو بالجرم المشهود..يعني الأكتر من تلاتين ألف معتقل لميناهون من الشوارع..و نحنا عم نقلون ” كشفناكي…ارفعي ايديكي” بس  بالقانون

بدنا قانون انتخابات بس ما يعملنا دوائر..و انو دائرة أحسن من دائرة..يعني و الله هالخالد عبود مو عن قليل صار يحكي بالمربعات و الأشكال الهندسية…أستاااااااااز يا ودييييييع

تحية اجلال وإكبار لشهداء الجيش الالكتروني..طب معلش اقترح نصب “افتراضي” للجندي الالكتروني المجهول؟؟

عندي الكون مفاجأة من أكتر من ألف موضوع…انتظروني بخطابات جاية..(يعني ازا لحقت ضل لوقتا) ا

كلامي جميل…و بيضل هو الأجمل..و بدي شاركو بمسابقة ” مس خطاب اوف ذا وورلد”  و هاهاهاهاهاها هيهي

تحية للشباب تبع اللجان الشعبية للوعي الوطني…يعني أنا حتى ما عطيتون العصي..هنن جابوهن من بيتون

للاجئين اللي بتركيا : ارجعو حبيباتي ارجعو…هي دبابة ما بتعض

و سنشكل لجنة من أجل مراقبة عمل اللجنة المشكلة على أنقاض اللجنة التي شكلت استكمالا للجنة المشكلة بموجب قرار اللجنة تبع التشكيلات….بس بالسرعة القصوى وخلال أيام

لك عم تغرغر عيني كل ما شوف انو الوفود اللي اجت كلها مجمعة على شي واحد…..محبتي

و أخيرا…نحنا ما بدنا دروس من حدا ( الحكي للكنة ” المعارضة” ..اسمعي يا جارة ” أبو الطيب العصملي” لأنو نحنا نموذج يحتذى به حذاءً…و اللي عم يدور عل الديمقراطية يجي يتعلم من أقرب فرع أمن عنا..يعني حسيت انو هاد تبع ” تقود العالم ” طنبرو للزلمة

و شو بدي حلللك لحلللك…بس يعني مشان الله خايف على قلبي من موجة هالتفائل بعد ما كان رح يغط ع قلبي

بس الهيئة انو اللي كنت نسيانو و أنا بهالتشائم كلو انو

دنب “الهو هو” أعوج و لو حطوه ب ٣ خطابات

و مبروك عالشعب الخطاب التالت

 

 

*انو كمان لا تواخزونا مالي بالعادة انتر مقالين ورا بعض…بس حسيت لازم شارك حدا بفرحتي*

 

 

 

GD Star Rating
loading...
GD Star Rating
loading...