GD Star Rating
loading...

Angry Muslim Man

 

تنويه: هذا المقال لا يستند الى حقائق لا تقبل الجدل و انما الى رأي شخصي جدا..و يرحب كثيرا بالجدل..اصلا شو طالع بايدنا غير الجدل!!

المهم, من يومين كنت عم احضر فيديو عن داعش مع طوني خليفة و جايب شيخين واحد شيعي و واحد سني و عم يسألهن ع أساس انو يا ترى هالشي مقبول بالاسلام؟ بالاسلام عموما يعني ع اساس هو ما عم يفرق و جايب جميع الاراء (طبعا بدون تقديم جميع الجرائم بس ما علينا)..و الله لا يورجيكن بحتة الشيخ السني! اسلوب مستفز و فاشل و بيضرب ع العصب..و بالنسبة لحدا سني (انا ع الاقل) يدعو الى اليأس..مباشرة حط حاله بموقف ضعيف و اتبنى اسلوب دفاعي هستيري و بلش باشمعنى حزب الله و اشمعنى ايران و الرافضة و المدري شبون و هات بقا يتهدى!! و طوني الراقي يقله سألتك سؤال محدد دين مو سياسة! و هو لا يزال عم ينط متل حمصة الكي!! انو هل يجوز قتل الاطفال! انت اجبني!! انو اخي لاء لا يجوز بس انت جاوبني!! و بكل رواق و اكابرية جاوبه الشيخ الشيعي, لا يجوز..قام هوي بعد ما لف و دار مية لفة و فوت السمك بالبندورة و الحليب بالنظرية النسبية و بشبه استحياء قال, لا لا يجوز!! و طبعا ما نسي يحيي “الاخوة المجاهدين” في داعش و النصرة الذين هبوا لنصرة اخوانهم المستضعفين ضد عصابات الاسد الغاشمة!!

يعني صفنت و انقهرت و كتير استفزني الفيديو! يعني حاولت اتخيل انو مالي سنية و عم شوف هيك شي, بصراحة تسويق اكتر من فاشل لقضية كتير محقة و ما فهمت من المقطع اللي شفته غير صريخ و ردح و بعبعة و ادانة من قلتها لجرائم عم تصير باسم مجموعة كبيرة ما عرفانة تلاقيها من مين و لا من مين..هالمجموعة اللي هني السنة..
مو بالضرورة بالحالة يكون الانتماء مرتبط بمدى الالتزام..بس في ارتباط هوية..كل حدا مننا ينتمي لمجموعة ما بغض النظر عن مدى تماهيه بكلشي مرتبط فيها (صورياً) و هالشي بيظهر اكتر و حتى بينفرض اكتر (شاء الشخص ام ابى) بأوقات الحروب و الازمات..يعني شي بيشبه اللي عايشينه..خاصة انو البشر عموما بيميلوا يقسموا بعض لمجموعات لانو هيك اسهل..انا من المؤمنين جدا جدا جدا بالفردية, بس ما بقدر انكر او انفي الانتماء الجمعي لجماعة ما اللي عادة بيكون اكبر من الفرد بكتير..
برأيي حاليا و حتى سابقا (بس يمكن ظهر الي شخصيا حاليا اكتر من قبل), السنة كجماعة ضحية مليون جهة مو جهة وحدة..قسم من هالجهات داخلي..مرتبط بطريقة التفكير و التعاطي و التمثيل..
يعني متل ما قلت فوق, في فشل اعلامي بتسويق قضية محقة يتمثل بالردح و البعبعة و المراجل الفاضية..الصيت النا و الفعل لغيرنا..بيطلع اللي بيقلك بدنا ندبح و بدنا نسلخ و هو اخره يدبح صوص و غيره عم يدبح و يسلخ فعليا بس بالشوكة و السكين..يعني حزب الله و الجماعات الشيعية مثلا عملت بلاوي زرقاء, بس بيطلعوا بمنتهى الوقاحة يحكوا برواق و هدوء و كل دعاة الانسانية متعاطفين معهن رغم انون جماعات مذهبية بشكل واضح! نظامنا العتيد,عمل اللي ما انعمل و فظع دينيا و طائفيا و انسانيا و ما خلا وساخة بالدنيا تعتب عليه, بس كلو ببدلة و كرافة و تحت سقف الوطن و علم الوطن!

شوفوا اسرائيل و الفلسطينيين و العرب عموما و قارنوا اللغة..بدنا نرمي بالبحر و نشوي و نقلي و عمليا مين اللي آكل هوا!

نحنا الدبيحة تبعنا اكتر مراجلهن طلعت علينا او نزلوا ببعض! و خود على بعبعة و حطونا كلنا شئنا ام ابينا بموقف دفاع و تبرير (المغتربين ببلاد الكفار بيعرفوا عن شو عم احكي)..و قسم كبير من المسؤولية بيقع علينا فعلا..هلأ في مين بيأيد هالجنان و يصطفل (كل مين عقلو براسو)..بس اللي رافض هالقصص, ليش يقبل ع حاله يكون بموقع دفاع دائم عن النفس,,وقفة وحدة حقيقية و واضحة, تنهي اي ارتباط مع هالناس و خلص! بس نحنا كل مين عايش بجزيرة و مافي لا كيان و لا شي..مافي شي بيجمعنا غير الفشل و المعاناة و السمعة العاطلة!

لك حتى بايام السلم و ما يختص بالدين كدين, الابروتش تبع قسم كبير مننا فايت بالحيط و كمان متخذ الموقف الدفاعي التبريري اللي شغلته تسجيل النقاط و انو شفتو قلتلكن..شي متل الولاد الصغار!! كم صفحة ع الفيس بوك بتشتغل على هالمبدأ! شاهد اسم الله بحبة البندورة!! انو يعني بدك تقلي انو ايمانك هالقد ضعيف و فايت بستمية حيط و عم تسنتى حبة البندورة لحتى تثبتلك ياه!! اي بلا منه!! و لاّ قصص انو شوفو كيف شوفير باص بلندن اسلم لانو الراكب المسلم رجعلو 20 بنس كان عاطيه ياها قصدا مشان يختبره!!! و يبدا زخ اللايكات و التعليقات :/ انو معقول! شو هالابتذال و الابتزار العاطفي و التسطيح! و قدي اللي بيعمل هيك معتبر بضاعته (بهالحالة صوريا الدين) بايرة لحتى عم يسوقلها باسلوب الشحادة و الكذب (اللي كمان للاسف استعملناه بالثورة)…رح حدا يقلي انو هي الصفحات شغل لايكات و من هالحكي..اي مزبوط..بس مين اللي عم يلييك!! انا بيستفزوني اللي بيعلقوا و بيعملوا لايك اكتر من صاحب البوست المقيت (تعود ع البوست و صاحبه كلمة مقيت)..و كتير من هدول ناس منعرفهن و بيعرفونا..ناس حقيقيين من لحم و دم و مثقفين و عين الله عليهن! بيستفزني اللي بيسمح لحدا يبتزوا عاطفيا بهالطريقة!

بتلاقي شيوخنا الافاضل بيهدوا و بيرعدوا ع قصص التشييع و التبشير!! عن جد هالشي بحسه دليل ضعف و عدم ثقة بالنفس..هالقد انت معتبر مذهبك غير مقنع لحتى تخاف من معلومة جديدة..هالقد معتبر المنتمي لمذهبك عقله بيروح و بيجي مع الكلمة! طيب المراقب الخارجي بهيك حالة شو رح يفهم, انو اكيد في شي غلط عندك..نقاط ضعف بدينك لحتى هالقد اسلوبك مولدن بما يتعلق باصغر التفاصيل!

فالزبدة انو لما تحط حالك بموقف دفاعي دائم و تقضيها على تبرير..و لما حدا يسألك ع شي بديهي بدل ما تجاوب اجابة مباشرة, تقعد تشوبر متل الولاد الصغار و تقول اشمعنى فلان و اشمعنى فلان, رح تثبت التهمة ع حالك و تنفر العالم منك و تضر قضيتك قد ما كانت محقة!!
من وين و لا من وين بدنا نلاقيها :( عددا و نسبة نحنا غالبا منشكل القسم الاكبر من ضحايا ” اخوتنا المجاهدين” و اخدين الصيت العاطل كله..قضية محقة..و مليون محامي دفاع كل واحد افشل من التاني..

 

سارة

GD Star Rating
loading...
GD Star Rating
loading...