GD Star Rating
loading...

9191175696_dc3d62d19d_z

 



صوتي  راح ماعاد طلع , رحت الطبيب قال: هاي نزلة برد
طالعت فيه وقلتلو : قررد؟
أومأ براسو تأكيداً وسألني : أكيد بتشكي من ضيق الحلق
هزيت راسي  بـ لا بل أشكي من ضيق الخلق
ضيقة خلق  لأني مو قادر أتنفس هواها، مو حاسس بطعم  الحياة بلاها
نفسي  أعفّر وجهي بتراب طيبها وأتوضا بقطرة نداها
رغم بعيدة عني لكنها تغلغلت جوايي بأقصى مداها
مثلها مثل أمي  رضا ربي ثم رضاها
أسمع أسمع يادكتور .. معقولة مو سامع متلي لحن نغمها وصداها!؟
طالع فيي الطبيب وشلح نضارتو وسماعتو عالمكتب رماها
وقال: روح روح عمي روح أطلبها من أهلها قبل لاتجن وتسوح بأرضها وسماها
مسكين هالدكتور مفكّر مافي حب إلا للـ حبيبة  ، وظنونه مافي علاج إلا بيد حكيم وطبيبة
معقول مادرس حب الأرض وعشقها وجواها؟!؟
معقولة ماذاق ولامرة بلسم زهورات الوطن ودواها!؟

الظاهر نسي أنو زهورات الوطن طيب وعلاج بحة صوتنا وقطرة عيونا
نسي أنو حب الوطن طيب وعلاج لشكنا وسوء ظنونا
نسي أقحوان السهل ويانسونه مهدأ لغضبنا وجنونا
راح فكرو لبعيد عن  جورينا وياسمينا وزنجبيلنا وبهاراتنا وكمونا
نسي الياسمين والفل  لأوجاع الشام
والجوري وشقائق النعمان لالآم الساحل
نسي البرقدوش والزنبق والسوسن لحرارة الجزيرة
والقرنفل والمنثور والريحان لإضطراب نواعير حماة
نسي الخزامى والزعتر واليانسون لألتهابات حمص
والزيزفون والجاردينيا والختمية  لبحّة صوت حوران
والمليسة والأقحوان والنفل لصداع أدلب
والزيزفون واللبلاب والنرجس لخفقان قلب حلب
نسي خلطة زهورات من تراب الوطن
كفيلة بإزالة أوجاع بشار الوثن
نسي أنو متل مالخيل الجموح مع لمسة حنان يهدّيها الرسن
كذلك أضطراباتنا يهدّيها خلطة زهرنا مع بقلة فاطمة ، كحب الصحابة مع حب الحسن
بإذن الله ياسيدي ابابكر وعمر وعثمان وعليّ كما كنتم  ضد كل من فرّق أو فَتن
سنبقى نستلهم حب اليسوع ومريم وبخور السلام على مر الزمن
عرفت علّتي وحبيبتي من هي يادكتور؟!؟
عرفت علاجي ؟ زهر  لظلم وقهر ودواء غالي الثمن
زهورات الوطن مجبولة بتراب وحب الوطن ..اليوم وبكرا وبعدو حتى يواروني الكفن

حر ولكن

GD Star Rating
loading...
GD Star Rating
loading...