GD Star Rating
loading...

 

 

صارلي زمان ما كتبت..إيه بعرف
لأنو صراحة ما عم اقدر…والسبب انو تحت بيتي فاتحين حوزة شيعية…وعلى لطم داخل وخارج اوقات الدوام…يعني شي مو طبيعي يا جماعة..وسيد فايت وسيد طالع،وربي ييسر…
ونحنا بها الثورة هدفنا الأول هو القضاء ع الشيعة وتسكير الحوزة اللي تحت بيتي…وكمان الحسينية اللي براس الحارة
وإزا طلع بإيدنا نلفلن الست زينب ونبعتها على ايران ما بقول لأ…ومن هون بحب قول،أنو ازا بشار الاسد بيحفظ سورة البقرة وجزء عم أنا من عندي مسامحو…طيب ما بيكفي؟منحفظو جزء تبارك كمان ومنخليه يعترف أنو سيدنا ابو بكر أحق من سيدنا علي بالخلافة…وهيك بتخلص مشاكلنا مع النظام وكلو بينبسط…
حدا متلي حاسس أنو هالثورة صفيان همها الأول هو سب ايران وحزب الله لأنهن شيعة؟
يعني لما يطلع احدهم يحكي او ينقد او يكتب مقال ويقول انو حسن نصر الله بلش يخبص…بقلو على راسي من فوق..حسن نصر الله عم يكيل بمكيالين،أي نعم واللي بيقول غير هيك غشيم وما بيطس…بس في مجال هي تبع حزب اللات وحزب الشيطان نبطلها؟؟؟شو بدنا برب الشياطين الزرق نحنا؟بدكون تسقطو النظام الاستبدادي الديكتاتوري اللي داعس ع كرامتنا من 40 سنة؟لما بدكون تسقطو طايفة عمرها 1400 سنة؟؟؟
اللي عم يعلكو ويسبو ع دين الشيعة…حدا منكن تضرر مباشرة من الشيعة اخي؟حدا منكن انجبر انو يتشيع؟أو فتحو حسينية تحت بيتو وبطل يعرف ينام مثلا؟
حدا شاف شيعة بسورية عم يسبو على صحابة لما على مقدسات لما على الله؟
في مجال تحلو عن رب الشيعة بـ5 ليرات؟
ببداية الثورة كنا نقول لا للطائفية…شو عدا ما بدا؟
كل يوم والتاني بيطلعولي بفيديوهات شي بيقرف بس مشان يثبتو أنو في ايرانيين عم يقتلو السوريين…طيب عال
شو الهدف من هالدعاية؟لا حدا يقلي مو فتنة طائفية…بعدين حلفاء سورية بلبنان كتار..ليش ما عم تهاجمو ميشيل عون لما وليد جمبلاط لما غيرون متل ما عم يتهاجم حسن “نصر اللات”وحزبه “حزب الشيطان”…أنو شبها اللات والعزى خيو؟؟
يا سيدي انا من عندي تحكمني اللات ما بزعل
ع الاقل اللات صنم ما بيضر ولا بينفع…
اي بس  نظامنا بيضر ما بينفع
ومنه…اذا بتحكمنا اصنام قريش أشرف
مع اني ضد الخطاب الطائفي جملة وتفصيلاً…
بس لو كان التحامل ع الطائفة العلوية مثلاً،كنا ممكن نقول شعب مكبوت من ورا هالنظام الطائفي وهاد تحامل مؤقت سيزول بزوال النظام…وبترجع المي لمجاريها…بس التحامل ضد الشيعة وبطريقة مقرفة صراحة…شو ذنب الشيعة يا جماعة؟ ما المشايخ من كل الطوائف عم تمسح جوخ للنظام…ليش ما حدا بيقول عن البوطي انه بوطي اللات وبوطي الشيطان؟ الخوارنة والمطارنة اللي عم تطلع تتمسح ببشار المعمدان ليش ما حدا عم يحكي عليهن؟ الشيخ والداعية محمد حبش ليش ما سميتوه أبرهة الحبشي مثلا؟ لما هيك نحن بدنا نعلن دين الشيعة…
يا شباب في ناس عم تبعبص بها الثورة…خلي مخنا دائماً مفتح…في ناس بدها تنفذ أهدافها “بالمعية”…اخي نحن بدنا نسقط النظام ونعمل نظام ديمقراطي وبس…ما دخلنا بالشيعة ولا بغيرون..لما بيجي الشيعي بيحطلك سيف ع رقبتك وبيقلك تشيع…وقتها في دولة قانون بتحبسو لأنو اعتدى على حريتك الشخصية…غير هيك ما دخلك فيه ولا بدينو…لما الحسينية (وأنا شخصيا عمري ما شفت حسينية وبشك انو في حدا متضرر من حسينية بكل هالبلد) لما الحسينية تعلي اللطميات ويبلش الخبط وما تقدر تنام الليل من وراهن…اتصل بالشرطة بيجو بيخالفوهن وبيصادرو مكبرات الصوت تبعهون..هاد تصوري لمرحلة ما بعد النظام..اذا انتو تصوركن انو بدنا ندبح بديانة الشيعة أو غيرهن فهاد كلام تاني
بعرف انو كلامي قاسي
وبعرف أنو هاد النص ونصوص غيرو كتبتها ما عجبت حدا…بس لا تزعلو مني آخر همي…
انا زلمة بحكي اللي بقلبي واللي شايفو…وانا اللي شايفو انو هالتخبيص اللي عم يصير وفتح الملف الشيعي مو وقتو بنوب وعم يخوف كتير عالم مو بس من الثورة،وإنما من الناس اللي ورا الثورة
انا ضد النظام لأنو النظام دموي..وطائفي..وحرامي..والرئيس مبهبط عليه الكرسي وحدّو يستلم رئيس بلدية بالبادية…
بس هالشي مو معناتو انو كل واحد قال انا مع الثورة سميه وطني وقلو ع راسي حارتك…
اذا الشغلة هيك خليني حط صورة خدام ورفعت واهتفلن بالمظاهرات..ما هنن مع الثورة!
اللي بيوافقني الرأي أنو ثورتنا ضد النظام مو ضد الشيعة…يا ريت يعمل شي..يعني لما نشوف شبكة شام وصفحة الثورة وغيرو من المواقع عم تكتب نصر اللات وحزب الشيطان..ما لازم نسكت..انا ما عم خون الشباب اللي عم تشتغل بصفحات الثورة..بالنهاية هنن ممكن عم يستعملو هالكلمات حماساً أو لأنهن متضايقين من موقف حزب الله المخزي تجاه الثورة السورية..بس اللي اخترع هالتسميات وروجلها بالبداية هو الطائفي…يا ريت نلغي هالكلمات من قاموسنا..وبخصوص الايرانيين اللي عم يقتلو الشعب السوري..كلنا منعرف انو سورية قادرة تصدر زعران على جنوب افريقيا..ايران عم تدعم النظام تقنيا؟صحيح ومليون بالمية…خبراء معلوماتية؟؟أكييييييد…بس هاد شي طبيعي لانو نظام ديكتاتوري حليف لنظام ديكتاتوري اخر…يعني متل ما كان السوفييت يساعدو المانيا الشرقية أمنيا واستخباراتياً…شي طبيعي!خاصة أنو الشعب الايراني “العظيم بكل معنى الكلمة” ثار على نظامو الفاشي الغبي الرجعي…وهالحكي سنة 2009 ،وقدر النظام الايراني يومها يقمع الثورة..والحمار اللي عندنا واللي عمرو ما شاف ثورة ما لقى غير احمدي نجاد يقلو دخيلك شو ساوي بحالي…
واللي بدو يثور ع الشيعة الكفار الفجار المارقين الفاسقين المجوس الصفويين…بحب قلو حبيبي خدلك حزام ناسف وتوكل ع الله وتيسر ع العراق…وفك عن ديانة ثورتنا ايه؟؟؟؟
وللبعص رايح بكرة اتشيع….وهيك!
———————-
GD Star Rating
loading...
GD Star Rating
loading...
الثورة السورية ضد الكفار و المجوس و حزب الشيطان, 2.6 out of 10 based on 53 ratings