GD Star Rating
loading...

مدري انا هيك عم حس مدري هيك صاير…بس انو بهل الفترة عم بتفركش بعبارات مالي متعود عليها..متل انو نحنا احفاد رسول الله…احفاد خالد…احفاد عمر…احفاد سمير….

انو بالاول تحمست…قلت طلع عنا بالعيلة مشاهير…اساسا انا عيلتي معفشكة..بزمناتو طلع منها مسؤول قام طلع حيوان و حرامي…..فحلو يطلع شخصيات مشهورة بالعيلة و سمعتها جيدة…المهم ضليت على هالحال فترة..كل ما احكى مع حدا قلو جدي  رسول الله هيك قال..و خالي خالد و عمتي فاطمة و عمي ابو بكر قالو و ساوو…..و نحنا عنا بقريش منساوي هيك و مناكل هيك… …ما صدقت طلع نسبي مهم يعني…..انبحتت..لوقت ما دورت على صور بألبوم العيلة و مالقيت اي صورة تجمعني فيهون…و قريت شوي بشجرة العيلة تبعي و مالقيت اي فرع و لا اثر بيربطني بهل الاشخاص…هو كلمة وحدة على اخراج القيد…هي يلي ممكن تكون الرابط بيني و بينهون…فقط لا غير..

هلأ بيجوز في عالم بيتحمسو هيك..و في عالم ما بيتحمسو..بس انو ما بصير عندهون ردة فعل..متل ما كان يصير معي….يعني لما اقرا عبارة احفاد رسول او احفاد غيرو ما تترك عندي انطباع سلبي…و بنفس الوقت ما تترك انطباع ايجابي..يكون شعوري هيك مبهم و بحاول انو ما فكر بالعبارة…بمر عليها مرور الكرام….

بعدين كنت عم اصفن فيها لانو شوي كتر استعمالها هالفترة…انو هلأ انا اخراج قيدي بيهيئني عقائديا انو هالعبارات هي ما تضرب على اي وتر او جرس طائفي براسي…انو طيب جدي رسول الله…خلص جدي رسول الله شو بدكون يعني…شو بصير عليي…بس الفكرة انو شو منشان يلي اخراج قيدهون بيخليهون يقولو انو هنن مالهون احفادو لهل الزلمة و لا التاني……انو ابتزبط يكونو احفادو ببساطة…و هيك عبارات ممكن تطن جرس طائفي…..هدول شو بيكون وضعهون؟

على حد علمي خالد بن الوليد ما اجا حارب منشان سوريا…اساسا ما كان في شي اسمو سوريا…و النبي محمد ما داس سوريا لنفس السبب…فمن وين اجا النسب و صرنا ابناء الوليد و احفاد الامام؟

من ايمتن الدين بيعطي نسب و نسل؟ عندي رفيق سويدي بوذي..قلتلو مبارح انو انا متعاطف معو بخصوص قضية النيبال بأعتبار اصولو نيبالية لانو بودا الله يحفظو ولد هنيك…الزلمة ابتسم هيك و قلي…تاك, بس انا سويدي يا جحش…..

انو اذا انا بعبد البطة مثلا…و انت بتعبد البطة..هالشي ما بيساوينا اخواة..و ما بيساوي البطة ستنا…هالشي بيقول انو نظرتي و قناعتي للبطة متل نظرتك و قناعتك..انو في شي مشترك بيني و بينك..بس في كتير شغلات مختلفة… انت ابن ابوك و امك و ستك و جدك..و انا ابن امي و ابي و ستي و جدي…ما لك اخي و البطة مالها ستي…

نحن بثورة لنبني سوريا جديدة…دولة للسوريين ككل..مو دولة للمسلمين و ضيوفهون…مو لنرجع نبني الدولة الاسلامية يلي خلص كازها من مليون سنة…انا سوري..قبل ما كون اي شي…يلي بيجمعك معي مو نسبك لنبي او لبطل…يلي بيجمعك معي هو انك سوري و بس…

خالد بن الوليد ما كان عم يحارب لنفس الهدف يلي نحن عم نحارب منشانو…ما حارب بأسم سوريا او لشعب سوريا…فليش صار بطل سوري؟ هو بطل اسلامي عربي…بس مانو سوري..و يلي بيعتبرو خالو او عمو…معناها يسلملي على عمو ابو لهب و مسيلمة بطريقو…

بعرف القصة رمزية عند البعض…بس انو تكون رمزية ما معناها بتكون صح…انو في كوشة انبياء بيأمنو فيهون العالم و خصوصا المسلمين…ليش نقيتو النبي يلي مو كل السوريين متفقين عليه؟  شبو ادم مثلا؟ حباب و نبي و بتحبوه و كل اهل الاديان موافقين عليه …..و ليش احفاد خالد مو احفاد بولس مثلا؟  ثم شو منشان السوريين يلي ما بيأمنو لا بدين و لا بنبي؟ هدول احفاد مين بقا؟ احفاد البطة السودا؟

و اذا بدنا نقول ايه انو خالد كان جدع و رجال و محنك عسكريا..فمنشان هيك بدنا نكون متلو…يا اخي فكرك لو خالد بن الوليد كان عم يحارب النظام بسوريا كان نفد؟  عيارو رصاصة من شبيح و هو على مداخل حمص بتهرو من على حصانو..فيعني حتى اساليبو الحربية و النضالية ما بتفيدنا بثورتنا مقدار انملة..بالعكس…نحنا ثورتنا سلمية.. …ماعنا لا احصنة و لا سيوف…فيعني مالي شايف شو المحفز و شو الهدف المرجو من استعمال دلالات اقصائية و بنفس الوقت مالها طعمة ثورية…بالعكس تماما..بتضر اكتر ما تفيد…

ثورتنا سورية….مالها اسلامية…ثورتنا ضد النظام الاستبدادي لنبني نظام ديمقراطي مدني مو لنرجع النظام الاسلامي…ثورتنا ثورة كل سوري مو ثورة كل مسلم…ثورتنا ثورة كرامة وطنية مو ثورة كرامة دينية…ثورتنا ثورة لتعز وطن مو لتعز دين…ثورتنا ضد حاكم مستبد و حرامي مو ضد كافر او مرتد…

انا سوري…انا ممكن كون حفيد يوسف العظمة…حقيد صالح العلي..حفيد جول جمال… حفيد سلطان الاطرش..حفيد حسن الخراط…حفيد ابراهيم هنانو….بس بأكدلك انو اكيد مالي حفيد رسول الله و لا خالد بن الوليد و لا صلاح الدين الايوبي ولا عمر بن العاص و لا حتى هارون الرشيد..

انا حفيد جدي..و جدي مات..و لما مات كان وطني مغتصب..و جدي ما نفعني بشي و ما رح ينفعني بشي..انو الزلمة ميت شو ممكن يفيدني؟….و اذا بدي حرر بلدي..بدي حررو لاني بدي كون سوري حر..بدي بلدي يكون حر و نضيف و حلو و متحضر ….مو لانو في نبي او اله او بطل تاريخي ساوا نفس الشي كرمال وطنو…

حشيش سوري

GD Star Rating
loading...
GD Star Rating
loading...
جدي رسول الله!؟, 5.0 out of 10 based on 97 ratings