GD Star Rating
loading...

بسم الله الرحمن الرحيم

بالأيام الأخيرة آلمني جداً أنو بعض الشباب لما وصل البل لدقنهم، ولما وصل العنف لمدينتهم، بلشو ينسو الشعار يلي هنن نفسهن كانو رافعينو وهو “السلمية”.. وبلشو شوي شوي يطلبو التدخل الخارجي العسكري أو عالأقل ما يمانعوا حدوثه!!

حابب بحكيي هلأ أني ذكركم وذكر حالي قبلكم ببعض المفاهيم يلي لازم تبقى راسخة بذهننا لحتى نحافظ على ثورتنا وعلى دم شعبنا..

أول شي يا جماعة بدنا نتذكر أنو رفضنا لرفع السلاح هو خير علينا، والمثال كتير كتير قريب وليكنا كلنا فاتحين التلفزيون عم نحتفل مع أخواتنا بليبيا..

يا جماعة ثورتهن بلشت 17 شباط ونحنا ب15 آذار (ولو أنو أحداث درعا يلي بلش فيها القتل الفعلي كانت بعد هالتاريخ)..

يلي بدي أوصله أنو شهداءنا بأسوأ التقارير الحقوقية يلي سمعتها لهلأ عم تقول أنو بيوصلو 2900 تقريباً..

والناس يلي عم يحكو عن المذابح وغيرها عم يقولوا أنو الشهداء بيوصلو لحوالي 8000..

بليبيا ما في رقم واضح بس بيقولو أنو عشرات الآلاااف.. وللعلم أنو الجمع بيبدأ من تلاتة وفوق.. يعني 30,000 شهيد أو أكتر

فرق شهر بيننا بس فرق العدد واضح تماماً أنه أضعاف!!

وكلنا منعرف أنو الأسد وفرق الموت تبعه مو أقل إجراماً من القذافي وكتائبه بنوب، لأ والكل بيعرف أنه كان صاحب القبضة الأمنية الأقسى عربياً..

شو سبب هالفرق بالعدد؟

السبب الأهم أنو أهلنا بالمدن المحاصرة وحتى بأسوأ الأحوال ما رفعوا السلاح..

شو بتفرق؟

يا سيدي بتفرق من ناحيتين..

أول شي دولياً: أنو لما عم يقاتل مدنيين، وعم يقصف مدنيين، والفيديوهات تثبت هالشي، وبشار وإعلامو الكذاب ما قدروا يثبتو العكس وحتى صوروا كم مسلسل مكشوفين عن مسلحين عم يطلقوا النار وما حدا صدقهم…

بقا هو رح يتركوه يقتل فترة بس الرأي العام بيضوووج وبتبدأ الشعوب يعترضوا عالدول تبعهن أنو شو هالصمت..

وبالتالي شفنا مظاهرات بكل العالم نصرة لثورة الشعب السلمية وبلش سحب السفراء والحصار الاقتصادي والمطالبة بالتنحي ولا حدا يقلي أنو هاد ما بيأثر، كل هالحكي بيأثر وبيهم النظام وإلا ما كان استمات الإعلام السوري بنفيه….

تاني شي بتفرق عسكرياً: كلنا سمعنا أنو الجيش مو دريان شو الأخبار وحتى سمعنا أنو الجيش ما بيعرفو شو المدينة يلي رايحين عليها!!!! يعني بياخدوهن على مدينة وبيقولولهن هدول مندسين سلفيين مجرمين قوصوهن..

الجيش لو شاف ناس معها سلاح وعم تحاربه كان دخل بالمعركة وزبطت الفبركة تبع النظام، بينما الجيش عم يفوت يلاقي ناس واقفة حاملة ورود وعم تنادي: الجيش والشعب ايد وحدة…

يعني وصلت رسالة لشرفاء الجيش أنو نحنا الشعب، أنا أخوك وهاد أبوك وهالشريفة أمك… وهون منصير منسمع بالانشقاقات!!

وكدليل على أنو تسليح الشعب مفيد للنظام، أننا سمعنا قصص واقعية ومؤكدة عن كتير مدن صار النظام يبعتلهن ناس يعرضو عليهن السلاح مشان يتسلحو، وكلنا منعرف أنو النظام ما رح يضر نفسو بنفسو، إذاً حمل السلاح بيفيده!!

وبالنهاية، ولو أجا كم واحد عبقري وحب يطنش هالحكي يلي فوق ويطلع السلاح بحب قلو أنو أنت بالكتير رح تدبر مسدس أو بارودة أو رشاش بالكتيييير!! النظام ما رح يجي لعندك وقتها حامل سكينة، رح يجيك بالدبابة والطيارة وبدون ما يقرب بيضرب البناية صاروخ بينزلها عالأرض بحجة وجود مسلحين…

قلي واحد مرة: بكرة بس الواحد يشوف أخوه تقوص قدام عيونو ما رح يبقى عم يقول سلمية

وبقلو لأخونا: إذا أخي باع دمه مشان البلد، أنا ما بروح ببيع البلد كرمال دم أخي!! وإلا وقتها بكون خسرت البلد وأخي…

وكلمة أخيرة: على مر التاريخ، مافي ثورة مسلحة أجا بعدها نظام ديمقراطي، ونحنا مو نيئة عن الخليقة لتزبط معنا ووالله مالنا حندفع كل هالشهداء لحتى يجينا نظام مو ديمقراطي بعدين!! أي شو استفدنا إذا راح الأسد وأجا ديناصور؟ :D

بظن لهون ما حدا بقي عم يشك بمنطق السلمية ويلي لسا ناوي يرفع سلاح بدي طلع سلاح وقوصه لأنو مالنا حابين نخسر الثورة بسببه.. وثورتنا ثورة سلمية، قلناها من أول يوم……

=-=-=-=-=-=-=-=-=-==-=-=-=-=-=-=-=-=-=-=

موضوع التدخل العسكري الخارجي..

شوف لنحكي بالعقل، أمريكا وأوروبا وغيرهم ليش ليدفعو هالملايين حق الصواريخ وكلفة نقل الجيوش ورواتب العساكر ويدفعوا أرواح جنودهم؟؟؟

لا حدا ينط يقلي قصة إنسانية وحيوانية ومساعدات وحقوق انسان الله يرضى عليكم لأنو هالاسطوانة باخت وخلصت موضتها..

كل دول العالم، بما فيها تركيا والسعودية والعرب، ما رح يعملو شي مو جاييتهن من وراه مصلحة…

فما بالكن أنو يعملوا شي رح يجيهن من وراه ضرر!!!!!!!!!!

شو الضرر؟؟؟ أيواااااا بلشنا بالجد…

الضرر يا سادة يا كرام أنو النظام الحالي كان حامي الحمى تبعهن، وحدود إسرائيل من جهة سوريا أئمن من حدودها من جهة البحر حتى!!! يعني من البحر ممكن تمرق شي سمكة قرش تاكل شي مستوطن اسرائيلي أما من سوريا حتى ناموسة تقرص اسرائيلي ما بيخلوها تمرق!!!

بقا نقلهن أنو يلا حنشيل هالنظام ويجي حدا وطني بيعبر عنا نحنا الشعب ويقول لإسرائيل أنتي عدوتنا الحقيقية ويبلش يطالب بالجولان ويحمي غزة بشكل واقعي؟؟؟؟؟؟؟ أي والله بيطير عقلهن!!!!

بقا لييييييش ليساعدوك ضد نظامك حبيبي؟؟

هنن أحسنلهم بكتيييير أنو يدعموا النظام، بس إذا كان النظام حمار متل عنا وما عرف يتصرف بيقومو ما رح يساعدوك تشيلو وتحط مين ما بدك محلو… رح يفوتو ويحطو جيوش عأساااااااااااس مشان حماية المدنيين وهية مشان يبقو هنن المسيطرين!!!

بينط رفيقنا هون بيقول: طيب هي ليبيا مو جنبها اسرائيل وساعدوها…

يا روح قلبي ليبيا بئر نفط… وما عم يطلقو صاروخ لليبيا إلا لما بيعرفو أنو حقو مدفوع دبل مدري دبلين سلفاً…

نحنا بسوريا شو بدنا ندفعلهن؟؟؟ تفاح ولا كرمنتينا؟؟

بعدين أنت بدك تخلص من هالجندي يلي ما بيخاف الله وعم يقوصك، بتقوم بتجيب واحد تاني بنفس الوضع إذا مو أضرب؟؟؟

فتحوا عيونكن الله يرضى عليكم…

وبأكدها ألف مرة: لا عرب ولا أجانب رح يدخلوا عسكرياً لسوريا إلا إذا رح تجيهم مصلحة من ورا هالشي، ممكن مصلحة البعض تكون شريفة وما تضرنا بس نحنا ما منستنى ليصير مصيرنا بإيديه ويقرر فينا متل ما بده!!

السؤال الأخير المطروح عادة: طيب وآخرتها؟؟؟

يا شباب، لهلأ لا حملنا سلاح ولا تدخل حدا عسكرياً، وشوفوا وين كان النظام ووين صار؟؟؟؟

لك كنا ما نسترجي نقول اسم بشار بيننا وبين حالنا، هلأ صار ممسحة!!!

لك كنا ما نسترجي نفتح تمنا بالسياسة هلأ بمشي بالحارة بلاقي تنين ختايرة عم يحكو وبالصوت العالي: “مرقت مبارح المظاهرة من هوووون” وبيرد عليه رفيقو كمان بالصوت العالي: “الله يحميهم وينصرهم ياااارب”!!!

بقا النظام عم يرجع لورا..

النظام اقتصادياً ماشي للإفلاس وشغالة المقاطعات داخلياً من الشعب وخارجياً من العقوبات!!

والناس اللي مع الثورة عم تزيد ما عم تقل كل يوم داخلياً وخارجياً!!! وسمعت من عمار القربي عالعربية اليوم عم يقول أنو والله العظيم بيعرف وزراااء وزراااء عم يقولوله أنو نحنا والله ما بدنا نقتل بس مجبورين عم تجي الأوامر غصبن عنا!! بقا مو مطول صدقوني….

والانشقاقات بالجيش عم تكتر يوم بعد يوم..

والدعم الخارجي عم ينقطع تدريجياً….

وخلونا ما ننسى أن الثورات العالمية كانت مدتها سنوات طوييييلة من الشغل، نحنا صح خمس شهور أطول من مصر وتونس، بس لساتها مدة كتير متواضعة…

ومعلش كمان نحنا شعب معمي على قلبو صرلوا النظام 40 سنة عم يشتغل ليعمينا عن السياسة وليعمينا عن الديمقراطية وليخلينا جاهلين بحقوقنا وبدستورنا وليركبنا ركب من كل النواحي وما نسترجي نفتح تمنا، بقا مو بيوم وليلة رح ننفض كل شي ونقلع هالنظام من شرشو…

وأصلاً الثورات السريعة جداً إلها مخاطرها لأنو بتبقى شروش النظام بالأرض..

حأعطيكم مثال صغييير عن ثورتنا:

يعني تخيلو لو هالنظام طار ب18 يوم متل مصر…

كيف كنا بدنا نكتشف أنو حسن نصرالله هو واحد كذاب وعميل ومو هامو غير رفيقو بيشو يبقى بالحكم؟؟ (كتير كتير كتير ناس وأنا منهم كنا مصدقين المظاهر الخادعة لهالشخص وأنو هاد يلي مبهدل اسرائيل)

بقا سلاحنا يا أبطال الصبر، الصبر والاستمرار بدون كلل ولا ملل..

في كتير وسائل سلمية بترهق وبتحرق أعصاب النظام.. ابتداءً من شعل شمعة وانتهاءً بالإضراب العام مروراً بالتظاهر والبخ على الجدران وتوزيع المنشورات وووووو…….

والزمن “جندي من جنود الثورة” متل ما بيقولوا لأنو الجيش والأمن عم يتعبوا ويرهقوا وهنن سهرانين وجوعانين وعم يتنقلو من مكان لمكان بدون ما يشوفوا أهلهم، ونحنا عم ننام ونفيق وناكل ونشرب وقاعدين بين أهلنا…

دمتم، ودامت سوريا حرة :)

———–

Memo Bog

GD Star Rating
loading...
GD Star Rating
loading...
شو يعني تدخل خارجي؟ و ليش السلمية؟, 6.0 out of 10 based on 24 ratings