GD Star Rating
loading...

مع توسع موضوع ايمان العبيدي , يللي انتشرت قصة اغتصابها من جنود كتائب القذافي بليبيا , عجبت الاعلام السوري الداعم هالرواية , لتطبيقها بسوريا ضد الثورة , او من باب استباق هالشي , و حرق هالكرت الاعلامي , قبل لا ينطرح بشكل مضاد للنظام , و هدا من ضمن عاهات و امراض الاعلام و النظام السوري

فكان مكان فتح القصة , مخيمات النازحين بتركيا , و كالعادة استخدم اعلام النظام , بكل غباء , مبدأ الكاريكاتير بخبرياتو , اي تضخيمها لتعمل ضجة اكبر , لعدم وجود شي يبثو اصلاً , غير قصص الفخر و الاباء , و فولاذية النظام , يللي قهر البارجة الالمانية , و ما تأئر باليورانيوم بقصة ملاط , و القصص بتطول , لوصلت ل / فضيحة / الاغتصاب بمخيمات النازحين بتركيا

من البداية ,  الاعلام , اعتمد بخبريتو على جريدة تركية  aydinlik  , محدودة الانتشار , و مالها اي وقع بالاعلام التركي , و ذكرت هالصحيفة , مع موقعها الالكتروني , بتاريخ 17 آب , عن وجود 400 حالة اغتصاب , للنساء السوريات النازحات , بمخيم – بوينويوغون – بمنطقة التناوز , و قال في ظهور لملامح الاعتداء الجنسي على اجساد بعضهن

و قال بعد الفحوصات , تبيين حمل 250 حالة , من الحالات المذكورة , و شو كمان ؟؟ قال انقطاع دورتهن الشهرية احدث بلبلة داخل المخيم !!! و قال تم استخدام بعضهن ليشتغلو بالعموم , خارج المخيم !!

و انو مختار القرية , يللي فيها المخيم , بيشتغل بالدعارة , فتم التعاون بينو و بين المسؤولين عن امن المخيم , بتسيهل خروجهن و عملهن بالمهنة ! و انو هدا السبب الوحيد , يللي دفع كتير من العائلات بالعودة لسورية

طبعاً الاعلام صال و جال , و ما ضل موقع و صحيفة ما جابت هالسيرة و ابداً ما خجل انو التشهير هو بالسوريين , و عجبتو هالقصة بس بقا وقف لهون , و اغلب هالاعلام ما كمل القصة او رواية الموقع التركي , يللي ما كان همو السوريات , و لا سلامة شرفهن , و اختلاق هالقصة كان للتشهير بأردوغان , و حمل نظامو المسؤولية , و انو تعتبر فضيحة لاردوغان بذاتو , و انو سكوت العوائل على فضايحهن , لستر الشرف رح يولد انفجار , و انو اردوغان لازم يتحمل مسؤولية هتك اعراض المسلمات

___________________________

صار ملاحقة لهالملف , من منظمات حقوقية , لتوصلت للحقايق ,  انو هالصحيفة , هي صحيفة هامشية , و تابعة لحزب يساري تركي متطرف , و زعيم هالحزب , معتقل و محكوم بتهمة تنظيم ارهابي , و هو واحد من مجموعة خططت لاحداث انقلاب , على حكومة اردوغان , و انو هالصحيفة , مبيعاتها محدودة و هي تُطبع بس لحضور هالحزب بالاعلام و بالشارع التركي , و عادة بتعتمد على هيك خبريات , صارخة , لتعمل حركة مبيعات , او تُجلب النظر للحزب المعارض , من فترة للتانية , و لو كانت اخبار مفبركة او خيالية , المهم مانشيت ملفت للنظر

و ارجع كتير من محللين اتراك , هالخبر للاعلام السوري , كونو و من بعد موقف اردوغان , بلش النظام السوري يحرك كل شيء معارض في تركيا , ضد حكومة اردوغان , و السبب التاني , هو اعتماد الاعلام السوري على خبرية هالجريدة , بدون لا دلائل و لا اثباتات , و رغم انها جريدة بدون مصداقية , و مالها اي تاريخ صحفي , الا انو كان هالخبر عند الاعلام السوري , و كأنو مُنزل , و مقطوع الشك باليقين , بمصداقيتو !! و كمان انو و لا هيئة اعلامية تركية ذكرت هيك شي عن المخيم , مع انو في كتير منها بيتردد , و في كتير منها معارض , بس كونو الخبر كلو ما الو اصل , فما كان مطروح بالاعلام بكل اطيافو

__________________________

و اذا منرجع عالخبر منلاقي , كل كذبة فيه اكبر من التانية , انو شلون عرفو العدد 400 , و مين عمل الفحوصات لل 250 , و عرف انهن حامل , و كيف اكتشفتو علائم الاغتصاب على جسم 250 وحدة , و المسخرة بتكمل , قال انقطاع الدورة الشهرية عمل بلبلة بالمخيم , و كأنها شغلة مكشوفة , و صعب تتخبى !! يعني لو وحدة من هالنساء / لا سمح الله / حصل عليها اعتداء , و انقطعت دورتها , رح تطلع و تحكي عالعلن بفضيحتها , و حتى لو وحدة حكت , معقول ال 400 يحكو عن حالهن !!  بعدين كيف انو حالات الاغتصاب صارت داخل المخيم , و الامن سهل خروجهن مع المختار ليعملو بالدعارة برى المخيم , طيب مازال اخدوها مهنة , ليش ليرجعو يفضحو حالهن , و ين اهاليهن ؟؟ يا عيب الشوم

__________________________

طبعاً مو عتب على حزب معارض لحكومة , ببلد غريب , انو يتاجر بعرضنا و شرفنا لمكسب سياسي

بس انو وصلت مع السوريين , و بغض النظر عن رأيهن السياسي , انو يسترخصو شرف و عرض سوريين متلهن , لمكاسب اعلامية تافهة , ما جابت اي نتيجة ايجابية للنظام او مكسب بيساعدو بحرب البقاء بالحكم

يللي جابتو انو في بعض الناس صدقت هالرغوة الاعلامية , داخلياً او خارجياً , و اصلاً اللوم كان عالنظام يللي , اذا صدقو انو صار هالشي جدلاً , فهو السبب , و هو يللي وصلهن لهون

و حتى لو كانو النازحين , هربانين من مجموعات مسلحة و مو من النظام , شو الفايدة من تهمهن بهتك اعراضهن , و حتى لو الحجة محاربة اردوغان , و تشكيك بقدرتو على ايواء النازحين السوريين , منقوم منحاربو بشرفنا و عرضنا !!

طب ليش ما صارت التهمة للنازحين ع لبنان ,, لانو النظام اللبناني موالي للنظام السوري ؟؟

النظام ما عاد يستغرب عليه شي , بس اعلام النظام ما عاد يعرف كيف يصطنع احداث لتعزيز ركوعو للاسد

و حتى لو اصل الخبرية هي من الموقع التركي , و الاعلام السوري بريء من خلقها , مجرد تدوالها بالصحف و المواقع السورية , بسلبية , هو هتك للاعراض , و لو حب يتناولها , كان من باب اولى , انو يتناولها كقضية انسانية , مو كشماتة و تشهير , بعرض اختو السورية !!

__________________________

و اسماء المواقع السورية , و الجرايد يللي نشرت و تبجحت بالخبر محفوظة , و هلق هي باقية و معتزة بالنظام , بس اكيد لو حاولت تنقلب لصالح الثورة بعد سقوط النظام , ف ح يكون في رفع لكتير من القضايا ضدها , بعيد عن قصص الفبركة و دعمها للنظام , صار في تهم اهم , و اهمهن التشهير و قصف المحصنات , و الاستهتار بشرف السوريات , يعني في ناس ماعاد في مجال يلعبو عالحبلين , او يحسبو خط الرجعة لنجاح الثورة بكلمتين ظراف او انو كانو مضغوطين , صار في حق و اعتبار , و لازم ينرد الحق بالقانون , و بأقصى العقوبات

/ الخبر كما ورد بموقع آيدينليك التركي /

شرفنا و كرامتنا غاليين ,, و ثورتنا اصلها ,  ثورة كرامة ,, و مع نجاحها رح نعلمكن كيف بتصان الكرامة

و الثورة منتصرة ,,

فري سيريا

GD Star Rating
loading...
GD Star Rating
loading...