GD Star Rating
a WordPress rating system

قتلى الجيش والأمن : الذريعة المفضلة عند أنصار النظام وأبواقه لاتهام الثورة بالعنف والتطرف ..
عرض التلفزيون السوري كتير جنازات لقتلى الجيش والأمن وبأغلب الأحيان ما قال وين “استشهدوا” هالأبطال ولا كيف.. بس انو الشهيد فلان بن فلان قتل بمنطقة كذا على يد الجماعات المسلحة ..
وأخبار تانية عم تطلع بشكل شبه يومي عن تعرض عناصر الجيش والأمن لـ”كمائن” او “هجوم” همجي على مراكز الأمن أو تجمعات الجيش .. طبعا بدون صور
وفي صور عرضها الجيش لعناصر من “الجيش” مقتولين وبلباسهم العسكري سواء جثثهم محروقة أو مدفونين بمقابر جماعية !!

كله كوم وعدد  قتلى الأمن والجيش كوم .. مرة بيكون العدد 200 بيقفز تاني يوم للـ 400  والجعفري قدام مجلس الأمن شال ورقة فيها 51 اسم من قتلى الأمن والجيش  وبيطلع بعدها بيحكي عن 500 شهيد !!  وطالب ابراهيم بيقول 1200 وناصر قنديل بيحكي عن قتلى بالآلاف من عناصر الجيش والأمن وبيلوم السلطات السورية على عدم الاعلان عنها .. واليوم طلعت بثينة شعبان بحل وسط .. 700 قتيل من الأمن والجيش و 700 قتيل من الإرهابيين .. هيك

نحنا ما مننكر انو في قتلى من الجيش والأمن .. بس النظام السوري لليوم ما حاكم اي شخص بتهمة قتل عناصر الأمن والجيش او الاعتداء عليهم .. ولا ظهر ع الاعلام السوري قتلة عناصر الأمن والجيش الحقيقيين  .. طبعا ما حدا اقتنع بقصة ابو نظير والدوش اللي صارت الموالاة قبل المعارضة تتمسخر عليها ..

روايتنا كمندسين انو عناصر الأمن والجيش عم يقتلو بعضهم بسبب الانشقاقات والانقسامات .. وقدمنا دليل عليها صور للمنشقين وصور لبعضهم مع المتظاهرين أو مصابين والمواطنين عم يسعفوهم مع وجود حالات فردية ومحدودة لمواطنين رفعوا السلاح بحجة الدفاع عن النفس  .. بالطرف التاني مافي شي من هاد .. مافي اعتراف أصلا انو المنشقين عم يقاتلو الجيش ويدافعو عن المدنيين .. مافي اعتراف غير بقصة عصابات مسلحة خرافية مجهولة الهوية انتشرت كالنار في الهشيم في كل مدن القطر وبلداته وصارت تتصيد عناصر الأمن والجيش البريئين والعزل وتندس يين المدنيين وتستهدفهم !!

القصة مو وجهة نظر .. هي أرواح مواطنين سواء كانو لابسين الزي الرسمي او مدنيين .. ومو لعبة بيدين الاعلام .. اعلام الثورة السورية عم يوثق اي عملية قتل وينشرها بموقع متخصص وعم ينتقل كل شي لجمعيات حقوق الانسان والمجتمع الدولي .. بينما الاعلام الغوغائي والفاشل السوري عم يتاجر بدماء الناس بكل بساطة .

GD Star Rating
a WordPress rating system
GD Star Rating
a WordPress rating system