GD Star Rating
loading...

ممكن انو فعلاً ظن الكتيرين , انو ذكر الثورة بحلب , هو من مبدأ النفخ بقربة مخرومة , او انو خيو ما مليتو , و لو بدها تمطر كانت غيمت , و كتير سمعنا اخبار , من اهلها , شي محبط , و شي بيعطي الامل , و لو انو الثورة قسي عودها , بس زيادة الخير خير , و هالحكي هالمرة , غير ما سمعناه بالسابق , و بيتطابق كتير مع اخبار من حلب على صفحات الفيس

 الصدمة كانت كبيرة اثناء و بعد جنازة الشيخ السلقيني , و انو خلص نفضنا الكفوف ببعضها و نفضنا ايدنا من حلب

صاحبي حلبي متل اغلب رفقاتي , معي متغرب بس بمدينة تانية , تعب ابوه و سافر يشق عليه , و قللي قبل لا ينزل , بدي خ*يها ,, انا ضحكت قلتلو شو بدك تعمل لحالك لك خاي , بس ع كلن الله يقويك

و صرلو نازل شي عشرين يوم , و مبارح بعتلي مسج انو نحكي و فعلا تقابلنا عالماسنجر و حكينا , و اول شي قللي ياه : بلشت *ريها , رجعت انا ضحكت متل الضحكة يللي مرقت , قللي الامور عنا غير ما بيوصللنا عالنت او بالاخبار المطروشة ,, حلب صارت مقسومة تلتين و تلت , تلتين مؤيدين للثورة , و تلت موالي , هالتلتين مقسومين نصين , نص تنظيمات و نص ناطر الشرارة ,,,  فأنا جلب على مسمعي شغلة تنظيمات , انو شلون يعني ؟

قللي التنظيمات عم تشتغل بالسر طبعاً , بس الرهبة معدومة , لانها اغلبهن اعتقل اقل شي مرة , بس عم يفرجو عنهن فوراً , انو من مبدأ قرصة ودن , و بنفس الوقت مابدهن البلد تقوم عليهن , فـ بياخدوه للواحد كم يوم و بيطالعوه , و من طلعتو و نتيجة الشي يللي بشوفو , فوراً بيتجه للتنظيم , و في مجموعة عم تنظم ع مستوى , لتطبق شي متل رزنامة الحرية تبعيت الشام , بس بحلب , لتنتشر صورة حلوة عن الثورة بين الناس و تكون مُشجعة , و قللي صار في شعار لأغلب التنظيمات و هو سقوط النظام بحلب , و نحنا حاسين بالتقصير , فالكل شغلو انو لما تقوم الثورة بحلب , تكون ضربة قاضية

فـ بللا ارادي قلتلو  : عيّن خير

فقللي , شوف انا كنت برى و بتعرف كيف تفكيري و همتي , و عم قلك و ماعم اكذب عليك , بتعرفني  كنت سب اليوم يللي جيت فيو حلبي , من العار يللي لحق فينا , بس لما صرت تحت لقيت انو فعلاً الناس مو متل ما منسمع , و كتير انبسطت انو حلب طلعت مو بهالسوء من الوصف , و في منها امل , و كبير كمان , طبعاً في تقصير , و انو صح النوم و هيك , بس في شغلة سلبية مهمة , انو عدد الحلبية مو متل حمص و حماه , يعني بيساوي اربع او خمس اضعاف , فـ وجود نسبة للموالين عم تكون مؤثرة , و عم يشتغلو متل الشيطان بالتخويف من القصص ماغيرها , البديل و الطائفية و هالحكي , و للاسف هي الفئة في كتير منها من الطبقات اللي ع اساس مثقفة , فـ يعني كلامهن معسول و مسموع , و لهيك عم يعلمو ردة فعل اتجاه الثورة عم تخلي المتردد يخاف , طبعاً مو عذر , بس هدا الواقع

و قللي كل فترة بيعملو حملة اعتقالات او اغتيال متل الدكتور صخر حلاق او سارية حسون , انو يعني يخلو البلد تحت جو العصابات و الرهبة  من انو قصص حمص تنتقل ع حلب , بس في جزء يمكن شي 40 بالمية من الحلبية , صارت طاوية صفحة النظام , و اتوقع بكل يوم انو تفيق و تلاقي حلب قايمة , و قللي انا مددت اجازتي شهر ع حسابي / بصراحة هون صدمني / , قلتلو جد ؟ قللي اي والله , يا اخي الامور كتير مبشرة و بدهن بالزايد واحد , و فعلاً النفسيات فوق ما تتخيل

بتعرف تجار حلب الهن اربع مصارف , ليبيا و العراق و تركيا و الداخل , يعني هدول اقوى منافذ بيع الهن , هلق ليبيا سلامتك , و تركيا نص نص , و الداخل معدوم لانو اكبر سوق كان حمص و حماه , قللي صفيان العراق , فـ كتير من التجار و بالذات الخيط و النسيج يللي هنن عصب التجارة بحلب , عم يكشو دبان , و هالشي خلاهن يتابعو الاحداث , لانو ايام الشغل بتعرف الحلبي , ما بيسمع و لا بيشوف الا شغلو , اي هلق الكل قاعد عالتلفزيون و عالنت , و هيك تقريباً انقسمو اغلبهن طبعاً مو مع الثورة , بس مو يعني مع النظام , يعني بين بين , بس فيك تقول صار في قابلية , و كمان نفس الحجج , البديل و الفوضى و بيخافو من مستقبل متل العراق , مع انو نص حلب زنكلت من ورى التجارة مع العراق من بعد ال2006

و للاسف صار في متل الحز بالنفس بين الحلبية نفسهن , يعني حتى القهاوي صارت معروفة هي ثورجية و هي منحبكجية , و بالعموم دائماً الزود بطرف الثورة , و مجموعتنا من يوم وصلت لهلق صار داخل فيها شي خمسين واحد جداد , و كتير اثرت شغلة الميدان بالحلبية بهاليومين , انو حسو بالعطب , و مابقي غيرهن , و يمكن يكون هالشي مضر بالمستقبل , فـ زادت الهمة , و طبعا يمكن نص امن سوريا بحلب , و بالذات محلات التجمع , يعني بسطات سيف الدولة و التلل و باب جنين و العبارة و الجميلية , كلها امن , و قيس متلها ع كل مناطق التجمعات , القهاوي مثلاً , بتلاقيهن فيها من الصبح للمسا ع نفس الطاولة , و يللي ما بيعجبهن , تاني يوم بينعفط , و كتيرين اندكو بالحبوس بالغلط , هيك اي شخص ما بيعجبهن بيسحبوه , بس متل ماقلتلك بيطلع بعد كم يوم , و ع كلام صحابي مافي كتير تعذيب , بس في كسر نفس و اهانات كتير , و اللي بيطلع بيحمس البقية و ان كان مع النظام او متردد بيقلب , و هلق اهم شي انو نقدر نطبق شي متل رزنامة الحرية , لانو عاملة صدى حلو كتير

قلتلو : هلق هالحكي حلو , بس انو يُمل , يعني العالم نسيت انو حلب تقوم بقا

قللي , مزبوط , بس نحنا عم نشتغل انو نبني قاعدة كبيرة , و يوم اللي نطلع , ما نطلع متل كل مرة على عشرين و خمسين و مية , و يكون سهل تفريقنا او شحطنا عالامن , هي كانت الغلطة , لذلك هلق , عم نرتب لانو تكون طلعة كبيرة , منو عالاعلام بيكون الها صدى , و منو بيصير صعب تفريقنا , و كل مؤيدن الثورة بحلب , عم يرتبو لهالشي , انو  قومة كبيرة و مفعول كبير , يعمل فرق بالثورة , هلق بدك تقلي انو سمعنا هالحكي , و طيب ايمت ,, حقك تقول , بس جد الهمة يوم عن يوم عم تفرق , و الاهم انو ما يصير غلط و نطلع طلعة صغيرة , يكون ضررها اكبر من فايدتها , لانو اذا اندكينا كلنا بالحبوس , هات بقا لنقوم مرة تانية , فـ لهيك بدنا نطلعها مرة وحدة , و قلتلك الحالة الاقتصادية كتير عم تفيد الثورة , يعني نسبة البطالة بحلب كانت شبه معدومة , اي هلق نص الورش سكرت , و يللي عم يلاقي تصريف لبضاعتو , مشى نص صناعو , فـ لهيك الاوضاع صعبة , و الكل بدو حل , اش من كان , المهم يخلصو , و على افعال النظام , فأغلبهن صار مقتنع انو ماخرج ترجع الايام متل ماكانت , و هون نحنا عم نبلش نوعي هالعالم و نسحبها لطرفنا , هلق صح اتأخرنا , بس هدا اللي صار , و همنا عللي جاي , و الامور بخير , حتى لو تأخرنا بس نهايتو عنا ان شالله , و عيّن خير , بس قوي قلبك و عيّن هالخير

________________________________

منتمنى جماعة رزنامة الحرية , يفعلّو هالفكرة الحضارية بحلب , او يضمو مجموعة من حلب لـ تطبيقها

________________________________

اغنية الثورة الحلبية ,,

من حلب الشهبا و للشام

متل الشمس بتضوي بلدي

راياتا ترفرف ما تنام

بلون الورد الجوري البلدي

حريتنــــا تنادينـــا

رفعنا راسا بإيدينا

و على حبك بلدي , ربينا

و من بعدي رح يربى ولدي

______________

رح  منغنيها ع القريب ,, و الثـــــورة منتصـــــرة ,,

فري سيريا

GD Star Rating
loading...
GD Star Rating
loading...