GD Star Rating
loading...

بسهل الزبداني قاعدين أربع شوام عم يحيو ليلتهن يوم الخميس بمزرعة أبو عبدو و محسوبكن منهن و  عم يسف هالمندرين آيس تي يلي متل البوظ و متلحف بكبوت و هالأراجيل عم تأرئع أرئعة …

شامي 1 : أربعة
شامي 2 : كوع
شامي 3 : خمسة لعيونك شريك
شامي 4 : معلم والله داق خلقي من هاللعبة حاسس لح طق !

شامي 1 : ليش يمان ليكون لأن عم تخسر؟
شامي 2 : يمان لعاب أحسن ما إشلفك بمنفضة السجاير
شامي 3 : الطرنيب بسطون
شامي 4 : يعني معقول يا زلمة عم نلعب شدة نحنا و العالم عم تموت و تتدعوس و البلد على كف عفريت؟

شامي 1 : هي فتحتلك بنت البسطون شريك مشان ريحك
شامي 2 : إنته ليش صاير بومة لك يمان؟ خلص نحنا بوادي و هنن بوادي!
شامي 3 : ***يا عليك و علي بقا يطالعك معو مشوار يلعمى بعيونك شو بتنئ!
شامي 4 : لك و الله عم إقرا أخبار كل يوم و ما عم أعرف نام بالليل يا رجل من هالقصص يلي عم بسمعها!

شامي 1 : ** إخت هاللعبة **صا… لك يمان كم مرة قلتلك هدول عالم فاضية و ما وراها شي ؟ يعني لو الواحد فيهن نزل اتعلملو شي مصلحة مو أحسن من إنو كل يوم يحرقله دولابين و يقضيها تحت الشموس؟
شامي 2 : لو من الأول مقوصين على مظاهرات الشر**** هدول كان ما وصلنا لهالمواصيل…
شامي 3 : لازم الواحد يشغل حاله مشان ما يفكر بهيك قصص و سير معتة…لح قوم جيب فحم
شامي 4 : طيب يا شباب على الأقل خلونا نتفق على شي يعني إنو شلتنا يكون تفكيرها موحد شو رأيكن ؟ اقنعوني و إلكن علي ما عاد افتح هيك سير و لح بوس التوبة ما بقا عيدها خلص

شامي 1 : يمان إنته مالك عرفان شو القصة…هدا يلي عم يصير بالبلد كله جاية من أميركا…هنن بيفصلو و نحنا منلبس…يعني موقع الفيسبوك موقع الفيسبوك هدا بأنو بلد اخترعو ؟
شامي 2 : كلهن يهود كلاب الله يلعنهن يا رب
شامي 3 : أبو عبدو زكرنا المرة الجاية نطلع معنا فحم و معسل مشان ما نطلع عمضايا حاكم كل شي أغلى هنيك
شامي 4 : لك بس موقع الفيسبوك هاد السوريين هنن يلي عم يستخدمو مشان يعبرو عن رأيهن ما حدا جابرهن يقولو شي! و الله عم يفتحلي عيوني على شغلات كتير!

شامي 1 : ما لح تجي معي لح إجي معك…معلمي إسرائيل إلها مصلحة تعمل فتنة جوات البلد مشان العالم اتدبح بعضها و نلتهى بحالنا مشان هنن يخلالهن الجو…عم حاكيك يمان خصوصاً إنو نحنا عنا شي أربعميت خمسميت ملة  غير ربك ما بيعرفهن…
شامي 2 : أنا اليوم شفت عالتلفزيون شلون كل شي أخبار عم تحطها الفضائيات فبركة بفبركة…لك شفت شلون هي قصة السفيرة كلها تلفيق ؟
شامي 3 : ايه مزبوط بيصورو الفيديو بالعراق و بيقولو عنا مبين من لهجة يلي بالفيديو مالها سورية أبداً…شو شايفينا جحاش نحنا و لا على جبينا نقطة حمرا
شامي 4 : هلأ تركتولي كل شي فيديوات و علقتولي قصة السفيرة و هدا الفيديو ؟ طيب هدا حمزة الشهيد و الـ…..

شامي 1 : كله كذب بكذب..ليكنا قاعدين بالشام و عين الله علينا عم إطلع عركن الدين ودي بضاعة كل كم يوم لا في دبابات و لا مظاهرات ولا **ـة بعمرهن
شامي 2 : لك طلعت أنا و إمي مبارح شفنا بنت بكفرسوسة الله يديم الأمان يا رب و بيني و بينكن صايرة كفرسوسة بتاخد الئعل عم تشتغل الدولة صايرة…و قال شو بدهن مليون مقدم و مليون مأخر ***سو **ـزي
شامي 3 : صعي أبو الزوز بتعرفلي أديش الدولار اليوم و كيف وضع سوق العملات نواحيكن بالحريقة…عم فكر إشتريلي ألفين دولار…
شامي 4 : بس هداك اليوم…

شامي 1 : بلا بس بلا بطيخ… حاجتك حكي بلا طعمة…شو نسيت شو قال الشيخ الجمعة الماضية ؟
شامي 2 : عنجد ما بيخافو الله هالعالم بدهن يعملو فتنة بالبلد و فساد عظيم…
شامي 3 : ايه على هالهويات شي بيرد الروح…لك دخيل رب الشام ايه….
شامي 4 : والله أنا بحبه للشيخ ****** الزلمة صاحب رأي و علم و رفيق البابا…

شامي 1 : ايه بقا خلصنا من هالسيرة بقا تجيك حما شو نكدي…شريكي ما في دولار بالسوق بس بحاكيلك أبو محمد بكرا و بعلملك ارجاع دقلي عالمحل بقلك إذا عنده ولا لأ…
شامي 2 : لك أحلى أبو اليمن لك ايه ها شايف ما أحلاك وإنته رايق و مبسوط دخيلو أنا…لك دخيل السياسي أنا إيه ؟
شامي 3 : يلا نكسر جماجم ابن عمي…
شامي 4 : لك آآآآآآآآآآخ بس آآآآخ…

شامي 1 : ايه **شي الطرنيب بسطون و أنا فاتح بنت البسطوني ملاكة…
شامي 2 : يلعن **ن هيك ورق
شامي 3 : يا محمممممد كبوت شريك على ***زهن
شامي 4 : لك شو صار بالفحمات معلم لح يطفي الراس!

*بكرجي

GD Star Rating
loading...
GD Star Rating
loading...
ليش الشامي ما بيتظاهر ؟ ج 2, 1.0 out of 10 based on 1 rating