GD Star Rating
loading...

هاد يا سيدي و هي رح مسككم وحده عليي منشان إذا شي يوم من الأيام رشحت حالي للرئاسه تستعملوها ضدي …أنا واحد قمرجي …يعني بلعب قمار و العياذ بالله …و على بوكر و بلاك جاك و قصص و سير …و اليوم بدي احكيلكم عن الرووليت …

الروليت باختصار عبارة عن دولاب …ولا قلكم ..بلاها سيرة الدولاب…الروليت عبارة عن صينيه مدورة و عم تلف حول محور يمر بنص مركزها أخو شر…المهم …بيجي “الكروبير” و هوه الموظف المسئول عن طاولة الروليت بيدحرج طابه صغيره على محيط هل صينيه و هيه عم تدور …و إنت (متل الأهبل أو متل الذكي ….حسب النتيجه …) بتحط  كل شي معك مساري  على رقم معين أو نتيجه معينه..و هالطابه عم تفتل و كل مالها سرعتها عم تنقص ….و تقرب تنزل بخانه معينه …هون الموظف بيقول جمله مهمه : نو مور بيتس ثانك يو (no more bets thank you)  …يعني خلص…رفعت الأقلام و جفت الصحف ….يلي نحط عالطاوله نحط و يلي ما نحط ما عد في مجال ينحط  …و هلأ كلنا (نحنا و الكازينو ) ما عد فينا نعمل شي أو نتراجع عن شي…و مصيرنا صار معلق بهالطابه و وإن بدها تستقر….فيا رح نكون من الرابحين يا من القانطين…

سبب هالحديث إنه الوضع بسورية اليوم وصل لمحل ما الموظف بالعاده بيقول : خلص  نو مور بيتس ….اليوم يلي عم يطالب بالحريه و رفع شعار أسقاط النظام… كان فيه يتراجع تقريبا لحد مبارح …بس هلأ  معد فيه يتراجع …و النظام يلي أتخذ قرار القمع و كان فيه يتراجع عن استخدامه لحد امبارح …هلا معد فيه يتراجع…سألتني ليش….ببساطة…لأنه و بعد استعمال هل قوه المفرطه بقمع الشعب …إذا هالشعب  قرر يحط عقله براسه و يهدي الوضع و يعطي السلطه الفرصه إنه تعمل اصلاحاتها الموعوده السلطه رح تفكر إنه عقل الرحمن يلي طب فجأة على هالشعب هوه نتيجة القمع و بالتالي ما في داعي لإصلاح… و أي مطالب مستقبليه رح يكون حلها بالقمع …و يلي بتعرف ديته أقتله…

من جهه أخرى …السلطه ممثله بسيادته و القيادة الأمنيه و بعد ما جربت أشكال العنف المختلفه بشقيها المعنوي و المادي …ما فيها منطقيا تجي هلا و تقول خلص قررت أسمعكم…أو إنه أنا فهمتكم…عرفت كيف؟ لأنه رح تبين كأنه خلص أسقط في يدها و معد بجعبثا من البيض شيئا…و بالتالي أي أصلاح هلا رح يتفسسر على إنه ترنح…وضعف…

طيب إذا هدول ما فيهم يتراجعو و هدنك ما فيهم يحطو عقل الرحمن براسهم حقنا للدماء ….شو يلي حيصير ؟؟؟حسب مني شايف رفعت الأقلام و جفت الصحف ….و كلنا رح نستنى نشوف وإن رح تنزل الطابه….يا أما السلطة رح تسحق هل معارضه بشكل ما يقوم لها قائمه من هون لحتى يصير حافظ الصغير بالحكم شي خمس عشر سنين …أو إنه تنقش مع هل شعب و تنزل الطابه محل ما حاطين ما فوقون و ما تحتون…

في عالم راهنت بحياتها …على لعبة روليت …الله يستر…..

RaymondO

GD Star Rating
loading...
GD Star Rating
loading...