GD Star Rating
loading...

من فترة مو طويلة شفت فيديو فيه مقاطع من مظاهرات هون و هنيك فيه شوية متظاهرين عم يهتفو انو بدهون خلافة اسلامية….و عم ينطو و يرددو انو الشعب هيك يريد… هلأ انا بالاول انهز بدني…بس بعدين لما سمعت انو الشعب هيك يريد…قلت يا صبي اذا الشعب هيك يريد..انت شو دخلك؟ خلص كبرها بتكبر و صغرها بتصغر…صحي انك نقاق و ما بيعجبك العجب…و مالك علاقة بجنس الديمقراطية…مو بدك حرية؟ ايه هي الحرية….

مبارح كنت قاعد عالكنباية وعم شم اصابيع رجليي و عم اتخيل سوريا بعد الاسد وهي هيك دولة الخلافة الاسلامية الحديثة….تخيلت الشعب ماشي ورا الخليفة و هو راكب على حصانو… و بعدين شفت جحافلنا موصلة للاس فيغاس هالمرة مو بس للاندلس… و كان في هيك قوس قزح معبي الدنية و الكل فرحان و حول الكعبة عم يطوفو مبسوطين…شربو مي.. قالو خي… رفعو راسون… شكرو ربون… ممنونين…انتابني الحماس و قمت كبيت كل بنطلوناتي بالزبالة و شقيت البرداية و عملت منها سبع جلابيات عرايسية منشان كون حاضر للاحتفال… فتت تحممت و استعملت مسواك بدل الليفة…منشان كون ماشي مع الموضة و الشعب يعني…و فتحت قازوزة على تمر و قعدت اتفرج على مسلسل عمر….منشان ثقف حالي يعني…. الشغلة فيها مستقبل بلد…مو لعبة…معقول كون جاهل بمصير سوريا المستقبل يعني بينما كل هالعالم بيعرفو اكتر مني…

بعدين خلصت السكرة…و اجت الفكرة…صفنت هيك… انو شلون يعني بدهون خلافة اسلامية؟ شو هي الخلافة الاسلامية؟ يعني خليفة و بيعة الرضوان و فتوحات اسلامية و هيك قصص؟ طيب اذا بدهون خلافة…ليش عم يحاربو الاسد و بدهون يسقطو و عم يقولو حرية و بطيخ؟ ما الزلمة هو خليفة عينو ابوه الخليفة يلي قبلو و بايعوه صحابتو الحزبيين و صلى الله و بارك…. انو شلون ثورة حرية و بعدين بدك خلافة؟…. ما مفهوم الخلافة هي ابعد ما يكون عن الديمقراطية المنشودة…. عيلة الامويين اخدو الخلافة بأنقلاب و خلوها بالعيلة من اب لابنو و اخوه و عمو لفترة طويلة قبل ما تجي عيلة العباسيين و تعمل انقلاب و تاخد الحكم و تتوارثو بين بعضها…الشعب ماكان الو ولاكلمة بالموضوع…. وين مفهوم الخلافة من الديمقراطية؟ معناها الاصح انو نحنا بدنا نغير خلافة الاسديين بخلافة عيلة جديدة الله اعلم مين هي…غالبا بدهون ياها عيلة سنية… بس شو تغير يعني؟  بمجرد غيرنا اسماء و طوائف؟ انت يعني ضمنان انو اذا اجاك خليفة او رئيس من طائفتك حياتك رح تكون احسن؟ انت المفروض تعرف انت حتى الخلفاء الاسلاميين كان في منهون المنيح و كان في منهون السئ… و الخليفة بيضل لزقان لوقت ما يموت..و بعدين بيجي ابنو او اخوه و الشعب بيتمنى انو يكون احسن….بس الشعب لا بيختار خليفة و لا بينتخب امير مؤمنين…

المجتمع البشري عم يتطور و التطور هو بالانتقال من مرحلة قديمة لمرحلة جديدة…. مرحلة الخلفاء و الامراء انتهت من زمان و صار في مفاهيم احدث…تخيل حالك جايب سيارة و رابطها بحمار ليجرلك ياها من باب العودة الى فترات ماضية من تاريخنا البشري…هالشي عكس التطور….عندك مشكلة بالسيارة…بتخترع حل جديد…مو بترجع الف سنة لورا و بتتجاهل نمط الحياة و طبيعتها و مستوى تطور الفكر و العقل البشري…. بس لانك بتتذكر انو على ايام الاحصنة و الحمير..ماكان في احتباس حراري… ما معناها حل مشكلة الاحتباس الحراري هو بـأستعمال الحمير من اول و جديد….

بيجي واحد بيقلك اخي هالشي ما بيقررو لا انا و لا انت…مو بدك حرية و ديمقراطية؟ اذا اجا 51 بالمية من الشعب و قال بدو خلافة اسلامية..مهما كان قصدو…و يلي هو غالبا قصدو بدو دولة اسلامية مو خلافة بس منفعل و ماعم يعرف يعبر……..بحسب قانون الديمقراطية لازم تصير خلافة..او دولة اسلامية…الشغلة مو بكيفك!

هلأ هالحكي بالمبدأ صحيح…بس الديمقراطية ابدا ما بتعني سيطرة الاغلبية على الاقلية بالشغلات يلي بتتعارض مع مبادئ الحياة و حقوقها يلي اي دولة ديمقراطية بتتضمنها لمواطنيها….يعني مثلا اذا عملو استفتاء انو لازم كل المسيحية بالبلد يعتنقو الاسلام بالغصب و صوت 51% بالمية من الناس عليها…صار لازم تتطبق لانو ديمقراطية و الاغلبية صوتت بنعم؟

قبل ما تطبق الديمقراطية في شي اسمو ورقة الحقوق او بيل اوف رايتس…يلي هي قائمة بالحقوق يلي بتكون مضمونة لكل مواطني الدولة و اي شي بيمس هالحقوق لا تصويت اغلبية و لا غيرو بيقدريتجاوزها او يلغيها.. الا اذا كان تصويت بالاغلبية الساحقة…يلي هو بين ال67 و ال 90 بالمية….كلشي دول عالم اول عندها هيك ورقة… هالحقوق بتضمن حق الحياة و التنقل و حرية التعبير و التجمع و حرية الدين و مليون قصة تانية  بتضمن للمواطن حياة عادلة فيها مساواة بينو و بين اي حدا تاني بالبلد…..طيب شلون بدك خلافة اسلامية يلي تلقائيا معناها الشريعة هي مصدر التشريع و الشريعة بتحط فوارق بين المسلمين و غيرهون؟….

ثم اخي لشو بدك دولة اسلامية؟ يعني رح تضمن الجنة؟ انت شو بدك؟ بدك بلد تحترمك كأنسان..بدك بلد تقدر تمارس فيها طقوس دينك بكل حرية…بدك تلبس عباية و تربي دقن توصل للارض و بدك تصلي سبعين وقت بالنهار…ماحدا الو على ربك شي…طيب هالشي فيك تعيشو مثلا بأي دولة من دول العالم الاول يلي ولا وحدة منها دولة اسلامية… بس عندهون ورقة الحقوق يلي بتضمنلك هالشي…. اما انو بدك دولة اسلامية تفرض قوانينها الاسلامية على الغير مسلمين فهي ما اسمها ديمقراطية و لا اسمها حرية…هي اسمها استبداد و اكل *رى…عندك 3 دول اسلامية بالعالم….ايران و السعودية و افغانستان.. يلي هنن من اكتر دول العالم قمعا و ظلما و استهتار بحقوق الانسان للمسلمين و غيرهون….و عندك تركيا….يلي معظم سكانها مسلمين بس مع هيك هي دولة علمانية و هي من كل الدول السابقة اكترهون ازدهارا….انت شو بدك سوريا تكون؟ ما رح تلاقي نبي يحكملك ياها….ليش بدك تختار شي بيفرق بينك و بين غيرك من ابناء بلدك؟

اخي شوف…لنفرض عمرك تلاتين سنة…يعني وسطيا بقيانلك شي اربعين سنة على هالكوكب…في حال طبعا ما طلعت بمظاهرة او انقصف بيتك….و بعد هيك عندك من وقتها للابد رح تعيش بدولة اسلامية رئيسها الله و يلي هي الجنة… طيب استحمل هالاربعين سنة و عيش و خلي غيرك يعيش…شو رح يأثر عليك اذا انا ما بصلي و ما بأمن بربك؟ يعني شو دخلك بالموضوع؟ رح تتحاسب عني؟ و لا بتخاف انو العب بعقلك و احرفك عن دينك؟ المفروض دينك اقوى من هيك….ما بدك تشوف مرتي لابسة بيكيني؟ طيب يا اخي لا تروح على مسبح مختلط….ما بدك ابنك يشوف بنتي بالشارع و هي لابسة قصير مثلا؟ خليه يغض البصر…مو هيك وصاك دينك؟ انا و بنتي و مرتي رضيانين انو نروح على جهنم و نحترق لابد الابدين…شو دخلك فينا؟ عيش و خلي غيرك يعيش…بلاها كترة الغلبة…بتجي بتقلي اخي انا ديني قلي اذا شفت شي غلط لازم غيري بأيدي او بلساني..طيب…بس مو دينك قلك كمان انو لا اكراه بالدين؟ ولا الشغلة خيار و فقوس؟……فلشو بدك سوريا الجديدة تكون سوريا اسلامية؟ سوريا ما عمرها الف و خمسميت سنة لحتى تقول بدك ترجعها لما كانت عليه….سوريا عمرها خمس تالاف سنة…يعني 3500 سنة قبل ما ربك ينزل دينك على كوكبنا….فشو بدك فهمني لانو ماعم افهم على ربك….و عطيني امثلة حديثة عن مفهوم الدولة يلي بدك ياه….و بطل تلحق شغلات اكل عليها الدهر متل الخلافة الاسلامية يلي كلشي بتعرفو عنها هي الشغلات الحلوة و الناصعة يلي اهل الدين بيخبروك عنها….انت ما عشت بهداك الزمن و ما بتعرف عنو كلشي… و اساسا زمن غير زمنا بكل المعايير….انت الشي يلي عم تركض وراه هو خرافة و سراب اكتر مما هو خلافة…

اخي عيش و خلي غيرك يعيش…و خلينا نحلم بسوريا جديدة…فيها كل السوريين متل بعض… خلي الجنة الك…حلال على ربك…ما بدي شاركك فيها…..بس خلينا نتشارك بسوريا و نبنيها سوا….ما بدنا خليفة…و لا امير مؤمنين..و لا قائد خالد…بدنا رئيس منتخب.. و خلي الدين لله و البلد للجميع….يستر على عرضك يعني..

—-

تعدييييييل…

http://www.youtube.com/watch?v=jw03gFXkftI&feature=youtu.be

GD Star Rating
loading...
GD Star Rating
loading...